Speurder Kobus Roode se ondersoek na 'n reeks bisarre kobra-moorde plaas hom teen 'n toordokter se bygelowige terreur, terwyl hy die ware samesweerders moet ontmasker wat die slange as dodelike wapens gebruik.
USD $6.99
9. SA POLISIE REEKS - DIE SLANGE VAN TUMARA
In die genadelose, afgeleë bosveld van Noord-Transvaal, waar bygeloof en die harde werklikheid hand aan hand loop, word ’n jong polisieman dood langs sy kampvuur gevind. Hy is die jongste slagoffer in ’n reeks bisarre en dodelike kobra-aanvalle. Sy laaste, onvoltooide dagboek inskrywing fluister van moord, nie ’n ongeluk nie. Die saak beland op die lessenaar van speurder sersant Kobus Roode, ’n gedugte jong speurder van Johannesburg met ’n reputasie vir die oplos van onmoontlike sake.
Met sy aankoms in die land van die Mkopo-stam word Roode egter begroet deur ’n muur van vyandigheid en vrees. Die stam word beheer deur die slinkse toordokter, Tumara, wat die bygelowige mense met die legende van die “Groot Slang Gees” in sy mag hou. Enigiemand wat Tumara se gesag bevraagteken, of met die polisie praat, word die volgende teiken van die wraaksugtige gees en sy dodelike slange.
Die gevaar is nie net bygeloof nie. Die kobras is onnatuurlik aggressief en skynbaar oral. Roode ontsnap self ter nouernood die dood toe hy in ’n hut vasgekeer word deur een van die reptiele, en word slegs gered deur die tydige ingryping van die plaaslike boer, Nicolaas Bredenkamp. Te midde van die spanning ontmoet hy ook Bredenkamp se pragtige en vrypostige niggie, Marie Naude, wie se nuuskierigheid haar direk in die pad van die onheil plaas. Terwyl Roode dieper delf, besef hy dat die aanvalle te presies en te doelgerig is om blote toeval te wees. Iemand gebruik die slange as ’n terreur wapen. Feitlik alleen, omring deur vyandige stamlede en dodelike reptiele wat op bevel blyk toe te slaan, moet Kobus ’n web van leuens, mag speletjies en koelbloedige moord ontrafel. Is Tumara werklik die meester brein, of is hy net ’n pion in ’n groter, meer diaboliese sameswering? In ’n land waar die sis van ’n kobra ’n vloek of ’n teregstelling kan beteken, moet Kobus die waarheid ontmasker voordat hy die volgende naam op die slagoffer lys word.
#SAPolisieReeks
Braam le Roux is die skuilnaam van Abraham le Roux (28/8/1918 - 31/12/1956) het feitlik al sy boeke onder die betrokke skuilnaam van Braam le Roux geskryf. Hy is egter tragies oorlede op ’n jong ouderdom van 38 jaar. Braam le Roux se uiters populêre Swart Luiperd reeks is ongetwyfeld sy bekendste reeks wat hy geskryf het. Na die vroegtydige afsterwe van Braam le Roux is Meiring Fouche genader om die Swart Luiperd reeks oor te neem en dit voltooi, weens die gewildheid van die reeks toe dit die eerste maal verskyn het. Die reeks eindig toe met sewentig boeke. Buiten die Swart Luiperd reeks het Braam le Roux ook verskeie ander sagteband stories geskryf, onder ander nog gewilde reekse, soos bv. die Temmers van die Woestyn reeks, SA Polisie reeks en Swerwer Speurder reeks. Sy paar hardeband boeke was minder populêr, alhoewel dit vandag steeds gelees word deur ieder en elk. Vandag word Braam le Roux allerweë beskou as een van die grootste Afrikaanse storieverhaal skrywers wat die land nog opgelewer het. In sy kort leeftyd het hy meer as ’n honderd sagteband boeke en meer as tien hardeband boeke geskryf en dit ewenaar ander groot skrywers soos Meiring Fouche, Gerrie Radlof en Casper H. Marais (almal skuilname), wie dit egter ’n leeftyd geneem het om ook meer as ’n honderd boeke te kon skryf. Het Braam le Roux sy lewe lank boeke geskryf, sou hy vandag seker ongetwyfeld bekend gestaan het as die grootste Afrikaanse storieboek skrywer in Suid Afrika se geskiedenis. Meiring Fouche is die skuilnaam van Francois Alwyn Venter (27/11//1916 - 8/1/1997) en is een van Suid Afrika se top skrywers wat oor ’n wye reeks van onderwerpe kon skryf. Ander skuilname wat hy gebruik het vir sy boeke was Marius de Jongh, Elske te Water en Rene Stegman. Onder die skuilnaam Meiring Fouche skryf hy egter meeste van sy boeke en bereik gou groot hoogtes met veral sy vier trek boeke, Offerland, Gelofte land, Geknelde land en Bedoelde land. Na die vroeë dood van Braam le Roux, neem F.A. Venter die bekende Swart Luiperd reeks oor by Braam le Roux en voltooi die reeks van sewentig boeke. Onder die skuilnaam Meiring Fouche skryf hy ook verskeie ander reekse (Baanbrekers reeks, Ryk Schoonraad reeks, Maagd van die See reeks en Fabel Retief reeks), waarvan die Sahara avontuur reeks seker een van sy heel beste reekse is. Hy het ook verskeie ander boeke geskryf, in reekse soos die SA Polisie reeks, terwyl ’n paar losstaande sagteband boeke ook uit sy pen verskyn het. In totaal het F.A. Venter meer as negentig sagteband boeke geskryf en meer as veertig hardeband boeke. F.A. Venter het ook verskeie kortverhale geskryf. Gerrie Radlof is die skuilnaam van Gerrit Lubbe van Zyl (27/11/1923 - 20/9/1971) en is nog een van Suid Afrika se top skrywers wat op ’n redelike jong ouderdom in ’n motorongeluk buite Melbosstrand oorlede is. Hy is veral bekend vir sy uiters gewilde Buiter boeke (hardeband), maar het ook groot hoogtes bereik met sy alombekende Oloff die Seerower sagteband reeks verhale. Dan is daar ook sy effens minder bekende Ramala reeks, wat egter sy langste reeks boeke is en ook die Tamar reeks, wat net uit twee boeke bestaan. Onder Gerrie Radlof skryf hy ook verskeie boeke in die SA Polisie reeks en ook die Swerwer Speurder reeks. Bostaande drie skrywers het almal bygedra aan die SA Polisie reeks van vier-en-twintig verhale, waarvan Braam le Roux die meeste stories in die reeks geskryf het, naamlik twaalf, Meiring Fouche het ses geskryf en Gerrie Radlof het ook ses stories in die reeks geskryf. In kort handel die SA Polisie reeks oor ’n konstabel met die naam van Kobus Roode. Hy is ’n sterk geboude man met bruin hare wat altyd kort gesny is, sodat dit soos ’n borselkop vertoon. Sy verhaal begin as student toe hy en twee van sy beste vriende in die Drakensberge gaan kamp het. Daar ontbloot hulle ’n geheime wapenarsenaal en wapenfabriek wat diep onder die aarde versteek is. In die proses sterf Kobus se twee vriende, maar Kobus kry dit reg om die skurke aan te keer en so die organisasie se onwettige bedrywighede tot stilstand te bring. Hierdie gebeure het so groot impak op Kobus se lewe gemaak dat hy daar en dan besluit het om homself voortaan te beywer om ’n konstabel te word. Kobus se loopbaan maak vinnig opgang en hy los die een groot internasionale saak na die ander op. Hy kry te doen met ontvoerders, moordenaars, diere smokkelaars, dagga smokkelaars en vele meer. Meeste van die tyd begewe hy hom in Natal, maar met tye word hy ook verplaas na Pretoria en Johannesburg, om sake daar te gaan oplos wat ander voor hom nie kon oplos nie. Menigmaal weier Kobus bevordering, want dit sal beteken dat hy kantoorwerk sal moet doen. Daar is vir hom niks lekkerder as om in die natuur te werk, op die rug van ’n perd nie. Juis hierdie liefde van hom maak dat hy op geheime plekke van skurke uitkom en hulle so daar verras en ontbloot. Die laaste paar boeke in die reeks handel oor verskillende konstabels se ervarings in Suid Afrika. Daar is konstabel Ryk Schutte se wedervaringe in Suidwes, konstabel Jurie Slabbert se drama in die Karoo, konstabels Reinhardt Fouche in Suidwes, Buks Senekal in die Kalahari, Henk van Reenen in die Sederberg en konstabel Kobus van Deventer se noue ontkoming in die Namib woestyn. Elk van hierdie stories is vol aksie, drama, spanning en ook so bietjie romanse tussendeur. Elke uitstekend geskryfde speurverhaal boei mens behoorlik van begin tot einde en die stories bly jou by, lank nadat jy dit klaar gelees het.
