Nadat speurder Obed de Swardt ’n mynontploffing as sabotasie identifiseer, word hy die teiken van ’n sameswering en moet alleen veg om ’n komplot te ontbloot wat die goudbedryf bedreig, terwyl ’n beeldskone vrou sy oordeel vertroebel.
USD $6.99
6. SWERWER SPEURDER REEKS - MOORD IN DIE MYN
’n Oorverdowende reeks ontploffings skeur deur die Main Deep goudmyn en laat ’n spoor van vernietiging en chaos agter. Vir die polisie lyk dit na ’n tragiese ongeluk, maar vir die legendariese privaatspeurder Obed de Swardt, die swerwer-speurder, is daar iets wat nie heeltemal pluis is nie. Sy instinkte dui op sameswering.
Sy soektog na die waarheid dompel hom onmiddellik in lewensgevaar. Die laaste, koorsagtige woorde van ’n sterwende myningenieur, “die meisie... by die partytjie...” is die enigste leidraad, en dit maak van Obed ’n teiken. Hy word ontvoer deur twee geslepe en gewetenlose mans wat tot enige uiterste sal gaan om uit te vind wat hy weet. In ’n klam kelder, vasgeketting en vir dood agtergelaat, moet Obed op sy vindingrykheid en fisieke krag staatmaak om ’n grusame einde vry te spring. Maar sy ontsnapping ontketen ’n genadelose teenreaksie. Getuies begin een na die ander verdwyn in skynbare self moorde en geheimsinnige verdwynings, terwyl die spore van die meester brein agter die aanvalle al hoe kouer word. Terwyl sy vriend by die polisie, speurder sersant Ekkie Eksteen, se hande deur amptelike prosedures gebind is, bevind De Swardt hom in ’n eensame wedloop teen tyd.
Sy ondersoek lei hom tot in die glinsterende wêreld van hoë sosiale kringe, waar hy vasgevang word in die web van ’n beeldskone, enigmatiese vrou met ’n donker verlede. Haar dodelike sjarme en sy eie onverwagse gevoelens vir haar dreig om sy oordeel te vertroebel, net toe hy sy kop die helderste moet hou. Hy besef gou dat die ramp by Main Deep slegs die begin was van ’n komplot wat Suid-Afrika se goud bedryf op sy knieë wil dwing. Met ’n onsigbare vyand en die polisie wat hom eerder as ’n struikelblok as ’n bondgenoot sien, moet Obed dieper krap as ooit tevore. Maar in ’n spel waar lojaliteit ’n illusie en verraad ’n wapen is, is die grootste gevaar dalk nie die koeël van ’n sluipmoordenaar nie, maar die soen van ’n beeldskone verleidster.
#SwerwerSpeurderReeks
Gerrie Radlof is die skuilnaam van Gerrit Lubbe van Zyl (27/11/1923 - 20/9/1971) en is nog een van Suid Afrika se top skrywers wat op ’n redelike jong ouderdom in ’n motorongeluk buite Melbosstrand oorlede is. Hy is veral bekend vir sy uiters gewilde Buiter boeke (hardeband), maar het ook groot hoogtes bereik met sy alombekende Oloff die Seerower sagteband reeks verhale. Dan is daar ook sy effens minder bekende Ramala reeks, wat egter sy langste reeks boeke is en ook die Tamar reeks, wat net uit twee boeke bestaan. Onder Gerrie Radlof skryf hy ook verskeie boeke in die SA Polisie reeks en ook die Swerwer Speurder reeks. Braam le Roux is die skuilnaam van Abraham le Roux (28/8/1918 - 31/12/1956) het feitlik al sy boeke onder die betrokke skuilnaam van Braam le Roux geskryf. Hy is egter tragies oorlede op ’n jong ouderdom van 38 jaar. Braam le Roux se uiters populêre Swart Luiperd reeks is ongetwyfeld sy bekendste reeks wat hy geskryf het. Na die vroegtydige afsterwe van Braam le Roux is Meiring Fouche genader om die Swart Luiperd reeks oor te neem en dit voltooi weens die gewildheid van die reeks toe dit die eerste maal verskyn het. Die reeks eindig toe met sewentig boeke. Buiten die Swart Luiperd reeks het Braam le Roux ook verskeie ander sagteband stories geskryf, in ander ook baie gewilde reekse, soos bv. die Temmers van die Woestyn reeks, SA Polisie reeks en Swerwer Speurder reeks. Sy paar hardeband boeke was minder populêr, alhoewel dit vandag steeds gelees word deur ieder en elk. Vandag word Braam le Roux allerweë beskou as een van die grootste Afrikaanse storieverhaal skrywers wat die land nog opgelewer het. In sy kort leeftyd het hy meer as ’n honderd sagteband boeke en meer as tien hardeband boeke geskryf en dit ewenaar ander groot skrywers soos Meiring Fouche, Gerrie Radlof en Casper H. Marais (almal skuilname), wie dit egter ’n leeftyd geneem het om ook meer as ’n honderd boeke te kon skryf. Het Braam le Roux sy lewe lank boeke geskryf, sou hy vandag seker ongetwyfeld bekend gestaan het as die grootste Afrikaanse storieboek skrywer in Suid Afrika se geskiedenis. Bitter min inligting is bekend oor Gys van Graan. Ons weet van meer as tien sagteband boeke wat hy geskryf het, maar geen hardebande nie. Hy het die Ridder reeks in sagteband geskryf, net minder as tien stories in die Swerwer Speurder reeks en ook enkele losstaande verhale. So ver bekend het hy onder geen skuilname geskryf nie. Bostaande drie skrywers het almal bygedra aan die Swerwer Speurder reeks van twee-en-twintig verhale, waarvan Gerrie Radlof die meeste stories in die reeks geskryf het, naamlik nege, Gys van Graan het agt geskryf en Braam le Roux het vyf daarvan geskryf. In kort handel die reeks oor ’n privaat speurder met die naam van Obed de Swardt. Hy bly saam met sy wolfhond genaamd Jagter en sy persoonlike sjef genaamd Amos, in Drie Gewels, ’n gerieflike groot huis in Linden, Johannesburg. Dan is daar ook sy aanvallige nooientjie Tessa Brink, wat hom ondersteun in vele van sy privaat speurwerk. Van jongs af het Obed al belang gestel in kriminologie en dit is juis hierdie uitdaging om kragte te meet met kriminele, wat aan hom die avontuur en lewenslus besorg waarna hy smag. Weens sy uitstekende rekord het Obed ook baie gou bekend geraak as die bobaas swerwer-speurder in die land. Verder is hy ook ’n kranige rugbyspeler wat vir Transvaal rugby speel in die vleuel posisie. Obed het ’n Bosveldplaas by sy pa geërf en daar boer ’n voorman namens hom op sy plaas. Die inkomste wat daaruit gegenereer word, is meer as genoeg vir Obed om luuks te lewe. Ten spyte daarvan dat Obed nie nodig het om te werk nie, doen hy privaat speurwerk en spoor hy meeste van sy sake self op, waarvoor hy gewoonlik nie betaling ontvang nie. Soms kontak sy een polisie vriend, Eddie, hom om te help met ’n belangrike saak, wat die polisie sukkel om self opgelos te kry. Dan is daar ook Jan Wiese, ’n goeie vriend van Obed, wat ’n redaksielid is van ’n groot dagblad in die stad en Obed verskaf altyd eerste vir hom die nuuswaardige stories, in ruil vir sy hulp van tyd tot tyd. Elke verhaal is uniek en propvol spanning en intriges wat die leser deurgaans aan die raai sal hou en groot genot sal verskaf om te lees.
